Scroll To

Matarauður Íslands nýtt heiti

MATARAUÐUR ÍSLANDS er nýtt heiti á verkefni um matvælaframleiðslu, matarmenningu og matarferðaþjónustu og heyrir undir sjávarútvegs- og landbúnaðarráðherra. Verkefnið hét áður Matvælalandið Ísland en það nafn reyndist frátekið af samstarfshópi nokkurra hagaðila í matvælageiranum.

MATARAUÐUR ÍSLANDS er með tilvísun í matvælaauðlindina og hliðarafurðir hennar og hefur skírskotun í matarmenningu og stolt. Matur er öflugt markaðsafl og mikilvægt að nýta aukinn áhuga á matarferðaþjónustu með því að setja aukinn slagkraft í uppbyggingu og markaðssetningu þeirra matarsérstöðu sem hver landshluti býr yfir. Á þessu ári er gert ráð fyrir að rúmlega tvær milljónir erlendra ferðamanna sæki Ísland heim og ef hver ferðamaður dvelur að meðaltali í 7 daga og borðar tvisvar á dag má reikna með að daglega bætast 77.000 máltíðir við neyslu Íslendinga.

Tilgangur verkefnisins er að skapa fjölbreyttari atvinnutækifæri í tengslum við matvælaiðnað og matarferðaþjónustu um land allt í sátt við sjálfbæra þróun og vilja heimamanna. Sömuleiðis verður unnið að því að efla jákvæða ímynd og vitund um íslenskar afurðir og staðbundna matarmenningu hér innanlands.

Samvinna og þekkingaryfirfærsla eru drifkraftar nýsköpunar og framþróunar. Hugsunin hjá stjórnvöldum er því að vinna þvert á greinar tengdum matvælum til að ná fram samlegðaráhrifum. Matvælageirinn tengist til dæmis orku-, umhverfis-, heilbrigðis- og ferðageiranum. Búið er að móta stefnu og er verið að vinna að því að stilla upp ákveðnum verkefnum.

Orðræðan um íslensk matvæli þarf að hverfast um stolt og þekkingu enda búa Íslendingar við þau skilyrði að geta framleitt gæðavörur í sátt við sjálfbæra þróun. Við þurfum hins vegar að gæta vel að stöðugleika gæða og bregðast við aukinni gæða- og umhverfisvitund neytenda í matvælum. Aukin krafa er um lífræna ræktun, rekjanleika og upprunavottun og meiri ásókn er í svæðisbundin matvæli sem gefa af sér minna sótspor.

Matarauður Saltfisktartar