Með því að opna þá fjársjóðskistu sem sagan geymir finnum við hugmyndir, hráefni eða aðferðir sem nýtast sem innblástur í bland við það sem nútíminn býður upp á.

Látum hugkvæmni, sjálfbærni og frumleika vera okkar leiðarljós. Heiðrum náttúrunnar gjafir og gerum kröfur til þeirra sem hafa framleitt af alúð landbúnaðarvörur í yfir þúsund ár. Tölum saman, eflum samvinnu ólíkra atvinnugreina því þekkingaryfirfærsla er drifkraftur nýsköpunar og framþróunar.

Ecotrophelia Europe  er alþjóðleg keppni um nýsköpun í sjálfbærri matvælaframleiðslu. Að henni standa hérlendis; Samtök iðnaðarins, Matís, Háskóli Íslands og Nýsköpunarmiðstöð Íslands. Þá er Matís þátttakandi í EIT-food verkefni (Nýsköpunar- og tæknistofnun Evrópu) en tilgangur þess er að finna leiðir til nýsköpunar á heimsmælikvarða.

Sjávarklasinn hefur gegnt mikilvægu hlutverki við að fóstra frumkvöðla og efla tengslanet þeirra og viðskiptahraðlar eru meir og meir farnir að horfa til matarfrumkvöðla og nýsköpunar í matvælageiranum. Eitt af hlutverkum landbúnaðarklasans er ennfremur að styðja við starf frumkvöðla.

Auka þarf vitund íslenskra fjárfesta um virði þess að fjárfesta í matvælaframleiðslu og matarfrumkvöðlum, en mikil áhersla hefur verið á tæknigeirann hingað til. Hreyfingin Slow Money hefur talað fyrir því að fjármagnseigendur noti minnst 1% af fjármunum sínum til að byggja upp framleiðslu matar með áherslu á heilnæmt hráefni og sjálfbæra þróun.

Hægt er m.a. að sækja um styrki til Tækniþróunarsjóðs Rannís, Framleiðnisjóðs landbúnaðar, AVS sjóðinn, Nýsköpunarsjóð atvinnulífssins, Nýsköpunarmiðstöðvar Íslands (frumkvöðla & fyrirtækjastyrki), Atvinnuþróunarfélaga, Atvinnu- og nýsköpunarráðuneytis, Arion banka (fyrirtæki/fjármögnun) og Frumkvöðlasjóð Íslandsbanka. Þá er auglýst eftir styrkumsóknum í samnorræn verkefni s.s. á vegum norræns samstarfs (norden.org) og frá Evrópusambandinu. Evris og Inspiralia aðstoða við að sækja um og fá evrópska styrki til vöruþróunar og undirbúnings markaðssetningar erlendis.

Viðskiptahraðlar eins og Start up Iceland, Icelandic startup og Reykjavík start up aðstoða frumkvöðla og Sjávarklasinn, Landbúnaðarklasinn, KPMG og Deloitte bjóða upp á frumkvöðlaráðgjöf. Ýmsir fjárfestingasjóðir eru starfandi eins og t.d. Crowberry Capital, Eyrir Invest og Nýsköpunarsjóður atvinnulífsins. Byggðastofnun og Svanni lánatryggingasjóður kvenna bjóða upp á lán.

Gott er að fylgjast með á fésbókarsíðum Matarfrumkvöðla eða Matarauðs Íslands.Vefsíðunni icemade.is er ætlað að draga saman allt það helsta sem um er að vera í sprotaumhverfinu almennt. Þá eru góðar upplýsingar fyrir frumkvöðla á síðu Nýsköpunarmiðstöðvar og upplýsingar um stafræna miðlun hér.

EF ÞÚ ERT FRUMKVÖÐULL Á MATVÆLASVIÐI ÞÁ MÁTTU FYLLA ÚT ÞETTA FORM OG VIÐ KOMUM ÞÉR Á VEFSÍÐUNA. 

Matarfrumkvöðlar

Drifkraftar nýsköpunar og framþróunar. Tækifæri fyrir fjárfesta