Uppskrift

Íslenskar lambakórónur með kryddjurtum og lakkríssalti, borið fram með hvítlaukskartöflumús, myntubrauðsósu, smjörgljáðum aspas, sveppum, radísum og þurrkuðum mangó

10 lambakórónur eða ca. 1 kg

Kryddlögur fyrir lambið:
• Ferskt timían (taka litlu laufin af)
• Ferskt rósmarín, laufin söxuð smátt
• Lakkríssalt, t.d. frá Saltverk
• Cumin
• Kanill
• Laukduft
• Þurrkað basilíkukrydd
• Fennel fræ
• Sítrónubörkur af einni sítrónu (saxa smátt, bara gula)
• Safi úr einni sítrónu
• Ólífuolía
• Salt og pipar

Blanda þessu öllu vel saman og leggja lambahryggsneiðarnar í löginn. Nudda honum vel á kjötið og láta liggja yfir nótt eða a.m.k 3 klst.
-------------
Takið kjötið út klukktíma fyrir steikingu til að fá jafnari eldun.
Grillið eða steikið kjötið á pönnu við frekar háan hita í 3 mínútur á hvorri hlið til að fá medium rare.
Látið kjötið hvíla í 5 mínútur undir álpappír áður en það er borið fram.

Myntubrauðsósa:
• Brauð (brauð sem er dálítið þétt í sér og helst pínulítið gamalt)
• Mynta
• 1 msk grófkornasinnep (t.d. Old style frá Maille)
• Nokkur kúmenfræ (t.d. frá Pottagöldrum)
• 3 msk ólífuolía
• 1 msk hvítvínsedik
• Salt og pipar

Saxið brauðið í smáa teninga.
Saxið myntuna einnig smátt og blanda þessu saman í skál. Gott er að hafa þrjá hluta af myntu á mótu einum af brauði. Ég er svo heppin að eiga nóg af myntu út í garði, en það kemur ekkert að sök þótt notað sé minna af myntunni. Það er líka hægt að nota þurrkaða myntu í sósuna en ferska myntan er fallegri og bragðsterkari.
Hella síðan þremur matskeiðum af góðri ólífuolíu og matskeið af hvítvínsediki.
Setja nokkur kúmenfræ út í og salta og pipra.
Sósan verður mun betri við að bíða í ísskáp í smá tíma.

Hvítlaukskartöflumús
• 6 stórar góðar íslenskar kartöflur, t.d. Gullauga
• 5 hvítlauksrif
• 200 ml rjómi
• 100 g smjör
• Salt

Flysjið kartöflurnar og skerið í 4 bita.
Merjið hvítlauksrifin og setjið í pott ásamt rjómanum. Hitið að suðu og látið sjóða við vægan hita í nokkrar mínútur. Kælið á meðan kartöflurnar sjóða.
Þegar kartöflurnar eru soðnar, hellið vatninu af og merjið þær í kartöfluklemmu, með gaffli eða jafnvel í hrærivél.
Setjið smjörið strax ofan í og hrærið saman við.
Hellið síðan hvítlauksrjómanum út í og blandið vel saman.
Smakkið til með góðu salti.
Gott að prófa sig áfram og hella rjómanum rólega saman við og sjá hvernig áferðin verður.
Það er annaðhvort hægt að setja síðan kartöflumúsina undir kjötið eða í litlar skálar eða fallega litla bolla og skeið með. Krökkum finnst oft mikið sport að borða kartöflumúsina sér, passa bara að eiga nóg af ábót ef það eru notaðir litlir bollar ;-)

Ferskur aspas
• Eitt búnt af ferkum aspas
• Smjörklípa
• Salt og pipar

Skolið asapasinn og brjótið trénaða hlutann af. Setjið aspasinn í sjóðandi vatn ásamt salti og ólífuolíu. Léttsjóða í 3 mínutur. Skolið aspasinn með köldu vatni. Steikja smjörklípu á pönnu og velta aspasnum þar í um 2 mínútur. Salt og pipra.

Sveppir:
• Einn pakki af fallegum íslenskum sveppum, t.d. kastaníusveppir
• Smjör
• Salt og pipar

Smjörsteikið sveppina í örfáar mínútur og saltið og piprið.

Radísur
• Nokkrar fallegar radísur

Ég á lítið rifjárn sem ég nota aðallega til að rífa sítrónubörk af. Ég prófaði að nota það á radísurnar og fékk þá fallega rauða strimla út úr ysta laginu og fallega hvíta strimla innan úr þeim.

Þurrkaður mangó:
• Nokkar sneiðar af þurrkuðum mangó (ef þið komist yfir hann)
• Hugmyndin mín upphaflega var að nota íslenska rófusnakkið frá lífræna býlínu Havarí í Berufirði, sem meðlæti og skraut, en þar sem ég bý í Bandaríkjunum þá gat ég ekki nálgast það við gerð réttarins. En kannski að rófusnakkið nái einhvern tímann til Bandaríkjanna ;-)

Ég skar þurrkaða mangóið í smáa teninga. Litríkt, fallegt og sætt á bragðið. Hvað getur klikkað? Ég setti mangóið yfir kartöflumúsina, ásamt nokkrum rósmarínlaufum úr garðinum.